ده وله ت كوردى

قودوومت وه خه ير ده وله ت كوردى

خه م سه د ساله م له دلم بردى

خودا خودام بى وه حه سره ت نه مرم

چه وم وه رى بى تو شادم كردى

 

يه سه مام جه لال تيه يگه و به يانى

گول گولارا بوود لاى سليمانى

كه ركووكيش ئمروو وه نازه و نازى

وه شيره كور ئيل بارزانى

 

له خوه شى پايلم زه مين نيه گرن

پياگ وژن یه کسه ر گورانی چرن

رمه ی قول دیای گیشتی ئه لپه رن

له ولایش دوشمنه یل له خوسه مرن

 

سه ربه رزم وه تو شيره پيشمه رگه

وه ته ن پوشايده ئى ساز و به رگه

 

چه ك وه شان و شه و وه خه و ه ر بويده

سروود كورده يل تا سوو چريده

 

ماموستا ئمروو روژ رووناکه

به و گول بکالیم وه مل ئی خاکه

مه کته ب و قه له م با عه قیده ت بوو

ئاوه دان بکه یم ئی خاک پاکه

 

له نوو شاده و بی روح شه یده یل

جاریگتر یه که و گرتن ئه زیزه یل

 

بومارگ له گيشت كورد وكورد دووسيگ

نويسه نده ى تاريخ بايه س بنويسيگ

 

ژیان را ئیمه مه رگ ئه را دوشمن 4

له چه و حه سویده یل دو پیاله بشکن

 

 

 

ديبا گول قرمز

قرمزترين گول تنى

مه خمه ل ديبا تنى

وه ى شوور وشه وق شه وه

ئارام گيانم تنى

 

شه مع شه وتار تنى

ده رمان تيمار تنى

موحتاج باده نييم

په يك شه راوم تنى

 

فكر نه كه ى بيزارم

سه رده رنيه كه م له كارم

دووسداشتنت خوو زانم

تاقه گول وه هارم

 

ئه سير عشقت منم

عشقت وه گيانم سه نم

فره ى هاتن وچگن

ئاخر وه مه يلت مه نم

 

دونيا چه نى جوانه

وه ره نگ قرمزت گول

په پووله عاشقانه

ره قصى وه ساز سونبول

 

له ناو گوله يل باخان

قرمزترى تو ئه ى گول

ده ور و به رت جه من جه م

كه مانِ ره نگ و بولبول

 

 

 

حه يرانم

من ك په روه رده ى بهيشتيوم له لاد

ميلكانم دووزه خه له دواى تو

دار و ده ورانم خسِم گيشتى وه پاد

به رگ حه يرانم وولم له هه واى تو

 

 

 

شوور

نیه زانم ئه را شووریگ هاسه رم

هه وه س کردمه و چه وه يل وه ده رم

دلم قرچيه يگه و جوور بالفرنه ك

دوبال ده ربكه م بلين بپه رم

 

 

 

چگيت

چگى هيشتيدەم وه جى

له ناو ئى دونياى خەمه

جوورىگ هاتگەس وەپيم

مەر خودا بيوشى چوەمه

 

دەس وه ديوارەو گِرِم

تاره ئى نوواى چەمه

وەسەر خوەمەو نييم

چمان ئازيگم كەمه

 

وە تەماى دەولەت نييم

هەر تو خوازم لەى دەمه

ئەر نەوى تن هامدەمم

هووز و هامسا راچوەمه

 

تن بچوو ئاسووده بوو

من كِ وادەى خوسەمه

فەسل پاييزم له نوو

وە لنگ زەرده و ماتەمه

 

چەنى موشتاقت بووم

وه خودا هالى كەمه

بى تو جەمعم وەل خەم و

وەل گرفتارى جەمه

 

شەو هە ماشەو بى خەوم

رووژ رووشن نالەمه

تن چگيت منيش مەنِم

بىكه سيگ له ى عاله مه

 

 

 

شه يدائى

وه ختيگ ئه وره يل سيه دوينم

كه فمه فكر شه و جودائى

نه خوه ر تابانيگ ئاسمان رووشن كرد

نه دلم خوه ش بى وه لوتفيگ خودائى

 

كافر وبى دين نييم حاشا

وه جى هاوردم نماز سه ودائى

جومه ى بيكه سه يل وه ته ن پووشام

سه رنامه سكه ى خه لوه ت شيدائى

 

 

 

دلداريم نه يه ن

يه مه گ دلبه ر چگ دلدارييم نه يه ن

نه ويشن ده م بكه ره و جوور مه ردم بخه ن

ئيوه مه ر زانن قه در دووس داشتن؟

قسيه ى بى فايده قه ت وه لم نه كه ن

 

دونيا بيه نه پيم وه ل ئاسمانه و

ساتيگ نيه تويه نن " دلنيام بكه ن"

ئه ر خوه شم توان له بنِ دله و

وه ى گران ده رده بچن وولم كه ن!

 

شه رته تامردن * چايه گه م تيه ل بوو"

تام ده م شيرين * دى نه كه م وه قه ن*

جوور بولبول خه مگين ته نيا له قه فه س

تاگيانم ده رچوو بمينم له به ن""

 

 

 

داشتيم

دلى بشكى ئه وه گ كه فته به ينمان

بكه فيگ وه ملى گوناه و ده ينمان.

سه رته پى بشيوى لانه ويزه و بوو

بالشتيگ داشتيم له ت كرت وه دووان

 

 

 

ماسى فرووش

ماسى وەختى گِ له ئاو درارن

لاشەى عەزيزى را بازار ديارن

ورسگەيل دەورجەساى جەم دوون

بان وخوارى كەن دڵى درارن

 

له ماسى فروش پرسن چەن مەنه

تام ماسيەگەد خاسه يان گەنه؟

نيەزانن گوناى گەوراى كردنه

دونيا ئاخرى مەرگه ومردنه

 

ماسى و دەريا عەهديان بەسياس

وەل يەكەو ژيان وه سەربردنه

 

زانى چەن هزار ماسى ودەريا

ئەى ماسى فروش نوورت كردنه؟

 

تەوبه كارى كه وداواى كەرەم كه

پەشيمان بوو لەى *دل فرووشتنه*

 

 

 

په شيمانم

ئه را وه ى جوره دايم وه يلانم

مينه ى مردن كه م سيرم له گيانم

چمان سه د ساله خوه ر وه چه و نه يمه

هاتنم ئه را؟ چه ن په شيمانم!!

 

ساتيگ خوه شمه چل شه و گريانم

چمان وه ل خوسه به سته ن په يمانم

يارب من به نه ى نازك ته وانم

فه رما سِس نه وگن حه بلِ ئيمانم

 

ئه را وه ى جوره ره نجه و ناشادم

چمان خودايا بردى له يادم

حاشا له لوتفد من كوفر نيه وشم

توخاون مولكى من خاك پادم

 

 

 

هامه شوونت

وهه ر لايگ بچى هه رهامه شوونت

تنى له يلام و منيش مه جنوونت

دونيا خِرره و چه رخ هه رچه ن بچه رخى

هه م ره سم وه لات وه دى كه م نوونت

 

 

 

من شاير نيم چوار قسه زانم

عاشقت *

بيومه*

خاسترين *

خانم*

 

ماموستا نيم يه ى كتاو ناسم

(عشق سووزانت شوعله ى ژيانم)!!!

 

من حه كيم نيم ده رمان بنيوسم

ده رد ديوريه گه ت ئاگر دا گيانم

 

ژه فتم هاتنه س ئه را نيشانيت

له خاو مه ر بيونن قسمه تد خانم

 

خوو ياخى نيم له بانِ كيوه

بانه خوازمه نيت منيش نه زانم

 

هه ركه ده ست خواست له هووز به وگت

وه بان لاشه م مه ر بچى زالم

 

 

په يكه ر پاكم

يه مه گ هاتى وه سه رخاكم

نه پرسى له په يكه رِ پاكم!

دلم راكى و چه وم وه كوو بيو؟

كِ من له وه فاداريا* ته نيا وتاكِم*

 

 

 

خانم

ئاگريگ دايده له دل له گيانم

ديوه ته وه ديوريد تيه له ژيانم

 

يه ى گِل خوه م وه نه زر يه ى جار باوانم

خوو دوست ديرم يه سه تاوانم

 

له گول نازارتر هه ر خوه دى خانم

هه رمن وه قه در و قيمه تد زانم

 

به و ئمشه و بنيش ساتيگ له شانم

وه ماچيگ بكه مه ست جيهانم

 

 

 

خوازمه نى

گه پدان كيه تا وه لى بيوشم

بامه خوازمه نى مننه ت بكيشم

ده سِ قه ومه يلد گيشتى ماچ بكه م

هه رچگ دارامه ئه راد بنيوسم

 

ميه رِگِ ماريگ له كاملا بارِم

تا بگرن قه درم كِرچ نه كه ن ريشم

خه لاتِ ره نگين گيانيش له بانى

گيانه گه م كه م بوو مه ر خوه م و خيشم

 

په لپِ ئاساره ئه ر وه ليم بگرن

ده سِد بيه نه پيم تا شه فه ق نيشم

هه رچگ ئاساره س ئه راد خه مه خوار

ئه ربه شِت نه كرد وه ل خوه ريش

ئيوشم

 

ئه ر ئه رام نيوسياس ئه را خوازينت

جوور دلِ فه رهاد جه فا بكيشم

رازييم وه جه فاوه خواست وفه رمان

ئه ر ده سِ ئاخر وه ل خوه د بنيشم

 

 

 

ره قيب عشق

گول رات ديارم چال ئه رام كنيد

وه ل شه وا گريوم را دوشمن خه نيد

وتم راد مردم سخانم نه شكن

له خوه شى لاره و كردى سه روه نيد

 

ياخودا بشكن مل ره قيبه يلم

حوكميگ به يده پيم يه ك له يان نيه يلم

گيانيان سينم قه وريان كه نم

تاله نوو دوسم بايگ وه سه ر مه يلم

 

 

 

ليوه

سه ر وه ليم شيوان ئى ديوه ته ليوه

ئى گوپ قرمزه و ئى هه نار شيوه

له سه ر سينگى كاله ن دو ميوه

وه قوروانى كه م چل ژن بيوه

 

هه ى وه نازه و چوو جاده په تى كه ن

ئى ليوه مه ردم گيشتى خِسه به ن

ئيلا ئيوشن خاس ئوولا ئيوشن گه ن

من ئيوشم قسيه كيلويگ وه چه ن؟

 

 

 

چه ئەرات بكەم؟

بەو بچيمه لاى قازى بنيشيم

يەك و دوو بەسه دى جەر نەكيشيم

من هامه تەمات تن له ليم بيزار

بەو تا راسيەگەى له دادگا بيوشيم

 

مەر له من خاستر وه دى كردييه؟

چوزانم له نوو را كى مردييه!

 

وه دروو وتيد ليوه رام بيوته

باورت كردم وتم يه شيته

 

يەمه چەبكەم وەرەو كوو بووام؟

وه هەر لاو بچم مەيلت ها نووام

 

شەرت بوو عاشقى نەكەم جاريگ تر

مەر ليوەم له نوو سەرم بايگه خِر!

 

زانى چەبكەيم ؟ واز بار له قازى

چوه ئەرات بارم تا بووى رازى؟

 

 

 

ته وبه

تن خودا نه يوشه م به سه وولى كه

ته وبه وه جى بار بچوو را مه كه

سه د نماز بخوه ن * گوناهد بشوور*

وه ر بنه و كه عبه وعاشقى نه كه

 

 

 

كاروبارم..

ره ختيگ له په مگ ئه راد ديارم

گول ره نگاوره نگ له ده ورى كارم

تيلايگ چِكِنِم په رده يگ ئه لخه مه و

له چه وهه سويده يل چه ودئه وشارم

 

ئه ر له ليم پرسين چه ئه وشاردمه

نيه يلم بزانن له كاروبارم

 

وسم له نووات كه سيگ نه وينيگه د

ئه ر ته ما بكه ن چه ميان درارم

 

 

 

شيرينه

دیته گه ى فه یلی وه ل عاشقیا

نه وكت برینه

وه ل پا قودوومه و كه تان كه تانه

ئه راد چرينه

وه خت ناوناين له ناو نازاره يل ناود

پرسينه

بيستوين بانگ دا دوه ته گه ى فه يلى

ناوى شيرينه

 

 

 

دلم نه شكن

دلم دى نه شكن جوور ئى ديواره

شوماره ى عومرم وه ر وه ره و خواره

جاده يل گيشت گه رديم وه شوون ونوونت

ده رنه كه فتى منيش وولم له ى شاره

 

هزاران هزار ئايم هانه خِر

چمان شوونه گه ت چووله وبيگاره

نه شه و ده ركه فتى نه سوو وه ل خوه را

وسم فيرت كه م به لكم ئيواره

 

 

 

دلدارى!

هه ر كه ياريگ داشت خر وه ده ورى خوارد

من را عشقه گه د گيانيش ده م وه باد

دلدارى قسيه يگ نيه بيوشنه ى

ديوه ته گه ى والى فيداى گه ردِ پاد

 

بيلا شه وگارم پر له شيوه ن بوو

به لكم بره سيگ ئه سريگم وه لاد

مه نزِلِد قه لاى سه خت والييه

هاتنم هه يهات ئه ى خودا موراد

 

 

 

مينه ت كه م

يه ى ئمشه و وه لِد قسيه نه كردم

چمان كيوه ى خه م وه كووله و بردم

 

هه رشه و ئى وه خته ناز يه ك كيشيم

تاوه پاى پِگا له لاى يه ك نيشيم

 

ده مته قه ى شيرين وه ل يه كه و كه يمن

جام مه ستانه وه كامه و به يمن

 

مِ ئيوشم هه ناس تِ ئيوشى حه بيب

ئه راى ده رد يه ك بيومنه سه ته بيب

 

چمان سه د ساله خه وه ر ليد نه يرم

شيرين هامنشين بيوده سه خه يرم

 

شه و داهاتگ وسم تا بايده و

وه ل يه ك بخوه يمن شه راو هه ر شه و

وه ناز وعيشوه مه ست مه س بوويم

شه وِ شيتيگ تر تاوه سه ر بووه يم.

 

 

 

ليوه نييم**

ئيقه ره له عشق بيوشمه و ئه رات

دله سه خه گه ت نه رميه و بكه م

ئه گه ر وه قسيه دلت نه رمه و نه يو

مه گه ر ته قه لاى *چاره يگ تر بكه م*

 

هه ركه س نه زانست عاشقى چه سه

قسيه ى چه فت ئيوشيگ جوور باقى مه ردم

نيه زانىگ وه كام زه نجير به سيامه

هه ست نيه كه ى وه ئاه *وه سووزِ ده ردم*

 

ئمروو مه ردم بازار شارِت

وه شوونم كه فتن وتن هه ى ليوه !

تن خودا مه گه ر عاشقى *عه يبه*

له ناو كردار و *ره سمه گه ى ئيوه؟

 

باناوم بنه ن پياگه ليوه گه

شه و و روژ وه شون *كه وكه شيوه گه*

دى دلم خوه ش كه ريو وه ليم نه شار

قه پيگ ليت بگرم .. *تازه ميوه گه*

 

 

 

دل بى تاو

ئه ى دل بى تاو كوشته ى كام دوسى

تاكه ى چه و وه رى جور خوه ر بسوزى

فايده دى نه يرى دلدارى كردن

وه ئنتزار چه م سيه مردن

 

وه و جووره هاتم وه ى جووره چگم

حه سره تيگ كيشام گه زيم كِلِگم

ساله يل عومرم يه ك يه ك سزانم

سال وه سال گه پ بيو ده رد گرانم

 

ئيوشم وه دلم به سه ده و كردن

وه شونِ ئاهيو نازِ چه م بردن

ئيوشيگه بچوو عشق ئاخره

سينم وه گيانم را غه زال مردن.

 

 

 

چه وه يلت سِرم

كوولايگ بسازم له دار ئه نجير

بانى بپووشم وه به رگِ ئه نگيور

ره ختِ ئه وريشِم وِلا ئه و بكه م

تن بويده خاتوو منيش بوومه مير

 

كيه نى ئاوِ سه رد كه نم وه قوله نگ

چم ئه را شكار وه تير و تفه نگ

مه ل ئه رات كوشم گِرم خه مه كوول

زيو ديامه وه خولكِت نايگه ته نگ

 

ئاگر ئه وكه مه و چوار كوچِگ چِنم

چه قوو تيژه و كه م پووسِ مه ل كِنِم

وه چه م بيوشه پيم گووشته خاسه گه

ده مه سيخ ئه رات تاشه و برشِنم

 

ديوكه لِ ئاگر * ئازارت بييه يگ*!

وه ديباى په مِگ چه وه يلت سِرم

سه رت نه مه بان شانه گه رمه گه م

ئارامت كه مه و به يت ئه رات چِرم

 

دونيايگ بسازم به ش خوه م و خوه ت

يه سه عاشقى *دى ئه رات مرم*

 

 

كاميان ؟

ديوه ته يل گيشتيان ئه گه ر جه م بووِن

ناويان بيوشن له كاملا و كووِن

حاكميش بيوشيگ هه ر يانه خووِن

مِ ئيوشم گشتيان وه نه زرت بووِن

 

عشق گه وهه ر و كوانه هه رخوه دى

يانه تازه كار *بازارِ نووِن*

تن له ياقوت و ئه لماس وئالتيون

وانه له قاقه ز له پارچه ى چووِن

 

تن عه ترگولى سه يره وبولبولى

يانه جوور كوچِگ بى مه زه و بووِن

ده مت ها خه نِگ جوور خونچه ى خوه شبوو

وانه نكبه تِن له ئاى وئووِن

 

وه ختى رى كه يدن له ناو كيوچه گه

هامسايل ئه لچِچكن ليوه وه ز دووِن

يه مه حاكم خوه ى * راسيه گه ى بيوشى*

تن له گيشت خاستر يا وانه خووِن؟

 

 

بچوو ولم كه

دل له ليم بكِن مه يل وه ليم بووِر

له يادم بووه ناوه گه م بسِر

دو خه ط بكيشه و *له بان عشقه گه م *

ناو كه سيگ تر له جى من بچِر

بچوو ولِم كه بيوش وه پيم بمِر

وه خيونِ دله گه م دليگ تر بخِر

من ولت نيه كه م دليش نيه كِنم

ديوار قه ورم ئه ر گريت بگر!!!!

 

 

چاره!

ئمشه چه ن شه وه له خاو بيزارم

ويرم هاله لاى زولفه يل يارم

سينه ى سه نتوور چاك بشكنم تارم

مه ر وه جام تيه ل چاره بوو كارم

سه عه د فه يلى

 

 

بى تو ژيانم**

ياخودا بايگه و دووست له سه فه ر

ئه گه ريش هه م نات كل بكه ى

خه وه ر

قاقه ز بنيوسيگ بيوشيگ وه هِرسه و

بى تو ژيانم هاله خه ته ر

 

ئيگل دله گه ت جگى ئارام بوو

وه خته تيه له گه د پر بوو له شه كه ر

خه نده بنيشيگ وه سه ر ليوه يلت

ناله دى نه كه ى قه ت وه بى

مه مه ر

 

 

بلا ديور

مه ردم ئيوشنه م را كى نيوسنيد

شه و و روژ قه له م قسيه پيچنيد

خوه شاله و كه سه شعر ئه راى به سيد

وه روژ خه ندانيد شه وان ليولنيد

 

نيه يوشم وه مه ردم راكى نيوسنم

جوور زارو شه ش مانگ راكى زيكنم

ترسم له چه وِ مه ردم بلا ديور

بيلا يه ى كاسه ى چينى بشكنم

 

 

 

عشق و سووز

ئاخرين هه ناس ئمشه و كيشمه ى

چه ن قسه ى دله تاسوو نيه يلمه ى

بيلا تا زنده م نه فه سيگ ديرم

عاشقت بيومه وه پيد بيوشمه ى

 

من دوست ديرم وه و نام نيشانه

چه وم نگابان شه و تا به يانه

له تو عه زيزتر نه يمه وه خودا

عشق سوزانت قاتل گيانه

 

 

 

عاشقى شيرينه

عاشقى شيرينه و عشقيش عه سه له

باو بنيش ئه لكه شِم وه ختِ مه ته له

 

روژيگ له روژه يل چه وم كه فته پيت

بى دانِ گه نِم كه فتمه ته له

 

ناز ئه رام كردى يه ى چه م خه فانى

وه يه ى قسيه ى خوه ش بردى ئى دله

 

له خوه شى چريم به رزه هه لهه له

له و ساته قسيه م شعره و غه زه له

 

وتم وه مه ردم وه ده نگِ بلين

چه ن خيون شيرينه ئى ديوه ته كوله

 

زووانى شه كه ر شيوه ى عه سه له

ديوه ت فه يلييه و ئاوات دله.

 

 

 

وه دروو خه نم 

وه دروو خه نم تاكه س نه زانى

جه سام عاجزه و سيره له گيانى

له خودا خوازم رووحم بسينى

عاشق بى دلبر مه رگه ژیانی

 

وه ختى دل چووله و* له عشق بى نسيو*

فايده ى چه س وسان تاگه ر به يانى ؟